"Connect" met ons op sosiale media.

Tienerbediening Ouerbrief

Liewe ouers,

Eerstens ‘n baie belangrike saak:

Ons is opsoek na nog vrywilligers vir die tienerbediening groepe. Die behoefte is pertinent:

  • 1 persoon by die graad 6 seuns
  • 1 persoon by die graad 8 meisies
  • 1 persoon by die graad 9 meisies
  • 1 persoon by die graad 10 seuns

Ons het ook ‘n paar name nodig vir aflosse om te kan instaan vir die gereelde leiers wanneer hulle nie beskikbaar is nie. Kontak my asseblief direk om aan te meld of bykomende inligting.

Ons het die afgelope Sondag die vierde week van ons 40 Dae reeks, Jesus ruik na mirre en stof se tema, Jesus ruik na parfuum hanteer.  Ons het die tema bespreek aan die hand van Markus 14:1-9 (Afrikaanse Bybel vir Almal – https://bible.com/bible/2/mrk.14.1-9.ABA.) Ons het die tema soos volg saamgevat:

  • Verstaan (Kennis, feite, insig): Jesus word deur sommige erken as die hoogste gesag, m.a.w. hul koning, maar Jesus wys dat dit deur die graf moet gaan.
  • Refleksie (Persoonlik insig en wysheid): Om Jesus as koning te herken is baie logies wanneer jy sy genade beleef.
  • Impak (Aksie en optrede): Om my waardevolste as uitdrukking van dankbaarheid en erkenning van sy heerskappy vir Jesus te gee.

Luister gerus as huishouding die daaglikse MP3 oordenking vanaf ons gemeente se SoundCloud profiel (https://soundcloud.com/ng-kenridge) om verder oor die tema te reflekteer en dit te integreer met jul lewens. Buiten die daaglikse teks en oordenkingsvrae is dit vol praktiese maniere om hierdie week hierdie tema deel te maak van ons alledaagse geloofslewe.

Die veranderde inperkingsregulasies mag ʼn impak op komende Sondag se byeenkoms hê. Hou daarom jul oë oop vir die reëlings op ons sosiale media blaaie, die VrydagNuus asook die reëlings e-pos wat Vrydag sal uitgaan. Ons gesels die komende Sondag oor die tema “Jesus ruik na bloed” wat ons duideliker laat rigting inslaan na Goeie Vrydag oor ʼn paar weke.

Ons kom weer hierdie Sondag in-persoon bymekaar en die volgende is belangrike inligting daarvoor:

Vrywilligers:

Ons het nog ‘n spesifieke behoefte vir ‘n vrywilliger by die volgende groepe:
– 1 persoon by die graad 6 seuns
– 1 persoon by die graad 8 meisies
– 1 persoon by die graad 9 meisies

– 1 persoon by die graad 10 seuns

Skakel my gerus direk vir meer inligting.

Ons hanteer Sondag die tema “Jesus ruik na bloed” saam met die gemeente.
Die gr. 6&7’s kom 10:00 – 11:00 bymekaar, terwyl die hoërskool jongmense om 18:00-19:00 by die kerk bymekaar kom. Ons gaan bietjie wors braai in die parkeerterrein agter die kerk se Grootsaal. As daar ouers is wat so bietjie saam wil rondhang om te help braai en die gesprekke wil afluister, is julle baie welkom!

Streng COVID protokol sal geld:

– Kinders wat nie 100% gesond voel nie, of komorbiditeite het, of vermoed dat hulle in kontak met ʼn Covid-19 draer was, moet asseblief by die huis bly.
– Kinders moet asb. ten alle tye ʼn masker dra.
– Ontsmet asseblief jou hande wanneer jy by die kerk kom.
– Ons het ʼn beperking op getalle, so ons kan net ʼn beperkte hoeveelheid kinders op ʼn slag verwelkom.