Deur Dave Viljoen
Daar is min woorde wat die Here se onbegryplike, volledige Godheid en sy oneindige heerskappy kan uitdruk. Daarom het die Joodse rabbi’s die eerste en die laaste letter van die Hebreeuse alfabet begin gebruik om die heelheid van iets wat van begin tot einde volmaak is mee uit te druk. Dit het ’n bekende gebruik in die oostelike Middellandse streke geword. Die Nuwe Testament is in Grieks geskryf en só is die Griekse alfabet se eerste letter (alfa) en laaste letter (omega) ook begin gebruik om na die Here te verwys.
In Jesaja 44 probeer die Here sy vernielde volk Israel, wat in daardie stadium ’n swaar vonnis in ’n ver land uitgedien het, met nuwe hoop opbeur. Hierdie hoop se oorsprong was baie spesifiek; dit het nie sommer net ontstaan nie. Die volk se hoop was in wié hulle Here was. Die Here was hulle Eerste en hulle Laaste, en buiten Hom was daar vir hulle geen ander God nie (v 6).
Die Here het Hom reeds in Jesaja 41 bekendgemaak as die Een wat beheer het oor die verloop van dinge: “Wie het die verloop van dinge van die begin af bepaal? Dit is Ek, die Here! Ek is die Eerste, en wanneer die laaste dinge gebeur, sal Ek nog die Here wees.”
Die Here Jesus het Hom baie eeue later op ’n soortgelyke manier aan Johannes bekendgestel as die Bron van nuwe hoop vir die hele aarde (Op 21). Johannes het die nuwe Jerusalem sien afkom aarde toe om die stukkende ou Jerusalem met nuwe hemelse skakerings te vervang. Die Een wat op die troon sit se stem het helder en duidelik gesê: “Kyk, Ek maak alles nuut.” Daardie selfde stem het kort daarna verklaar: “Dit het klaar gebeur. Ek is die Alfa en die Omega, die Begin en die Einde.”
In sy reeks Surprised by Hope pleit NT Wright dat gelowiges se hoop minder moet hunker na ’n nadoodse, hemelse bestemming om só van die aarde af na ’n ander plek verlos te word, en eerder moet hunker “to transform the earth in a way that will heal it” om so alles saam met Jesus te help nuut maak aan hierdie kant van die dood. Hy sê: “The kingdom of heaven is not a place where you go to escape from earth. The kingdom of heaven means the sovereign rule of heaven which is coming to birth on earth.”
In die middel van die Bergpreek nooi Jesus alle gelowiges om te bid en saam met Hom te woeker sodat sy wil op aarde sal geskied, net soos in die hemel. Wright kleur dit mooi in: “God’s space and our space are meant to work together.” Die werklikheid van die nuwe Jerusalem en God wat alles nuut maak is nie net toekomsmusiek nie. Dit is vir hierdie aarde én die volgende aarde bedoel.
Die Eerste en die Laaste, die Begin en die Einde, die Alfa en die Omega, die Een aan wie se liefde daar geen einde is nie (Ps 136), wil jou deel maak van sy almal-insluitende en allesomvattende liefdeswerk sodat die hele aarde gevul kan word met nuwe HOOP.